اوغلوم دایان!!!

اوغلوم دایان!
گئتمه دور؛
یوللار کولکلی دیر
زیروه لر آلا چالپوو
اوجا داغلارین دونماسی وار
گوی کدردن قارالیر
سازاق جیلخایا تاخیلیر
گونشی ظولمت تیکه تیکه باغرینا باسیر
آی،آی باتاندا شاققالانیر
اولدوزلار گؤده مده چیبان چیخیر
باتی اوره ییمده دینجه لیر
قانیم آرازدا لاختالانیر
بارماقلاریم موغام چالیر
ساچلاریمی
دوداقلاریم شعیر سسله ییر
احساسیمی
هاوالار اوره ییمی دئشیر
سازیم سنیر
تبریزین مصللاسیندا
نغمه لریم ناغیل اولور
سوزجؤکلریم قاری ننه نین دوداقلاریندان سؤزور
بیری واردی ،بیری یوخدو
بیری واردی آدی نیفرت
بیری واردی آدی حسرت
بیری یوخدو آنام
بیری یوخدو کیملیگیم
کیملیگیم بوغازیمدا جان وئریر
کیملیگیم دیلیمدن آسیلیر
آرازین ماوی گؤزلرینده بوغولور
کرپیچ دووارلارا سؤیکه نیر
داریسقال کؤچه لرده باریت قوخویور
خیابانلار ،بومبا پارتلاییر کئچمیشیمی
یئر آغیز آچمیش
تاریخی گمیتله ییر

***
ایلایین سون نفسینده
گونش دوغودان اینتیحار ائدیر
فصیل لر دئییشیر
دوشونجه لر چیچک له نیر
اوزلؤگوم اوزؤمده گول آچیر
قاییدیرام منلییمه
دئییرم؛
دئییرم یاشاسین
 دده عدالت
یاشاسین دوستاق
یاشاسین...

دئديم ،دئدي

دئديم،دئدي

 

دئدیم: ای گول، سنه بلبل من اولام، وارمی سؤزون؟

نه گؤزل سؤیلدی بلبل، گوله تیکمیشدی گؤزون

 

دئدیم: ای گول، سنی تعریف ائدرم بیر نفسه

دئدی: بلبل اوخوجاق، گول گله­ جکدیر هوسه

 

دئدیم: ای گول، اوخوسام نغمه­ می، کیم اوینایاجاق؟

دئدی: گولشنده­ کی گوللر، اوخو کی دویمایاجاق

 

دئدیم: ای غنچه-ی تر، باغریمی قان ائیله­ مه ­سن

دئدی: وصل ائیله­ مه ­سن، بوردا مکان ائیله­ مه­ سن!

 

دئدیم: آمــال-ی وصــالین، منه سودادی گولوم

دئدی: سئوداما یمین! وصلدی یا اینکه اؤلــؤم

 

سؤیله­ دیم: من سنی گولشنده گؤروب شاد اولورام

دئدی: من ده سنیلن،عشقه حیاتلان دولــورام

 

دئدیم: اودلار بورویوب، قلبیمی سنـلن یـانیرام

دئدی: گؤردوکجه سنی، دنیانی کؤکدن دانیرام

 

سؤیله­ دیم: مسکن ائدیبسن، اوره­ ییمده گل-ی ناز

دئدی: هر یئر منه پاییزدی، وجودون منه یــاز

 

دئدیم: ای گول، منه کیمدیر کی وفادار اولاجاق؟

دئدی: مندن سنه بیر سئوگیلی دلدار اولاجاق

 

"وفا"نین آرزولاری بوردا گول آچدی نازا باخ

آلدی حقدن نفسی، نازیلا بو اعجـــازا بـــاخ!

 

 

یاز گلیر ــ شانلي دياردان اوخو

 

 

سلام و خوش گلدين بوتون بو حقيرين وبلاگينا گلنلره بو پستوم دا نئچه شاعردن آد آپارميشام چون كي بير شعرده محدود شكيلده آد آپارماق اولور اونا خاطير بوتون عزيزلريمدن كي دئيرلي آدلاري قلمدن دوشوب عؤذر خواهليق ائلييب و اللريزدن اوپورم

 

 

شانلي دياردان اوخو

 

دفتري آچ شاعير طبعين اويانسين

قيش سوووشوب گوللو باهاردان اوخو

چايپارادان چاغير كتلي "شاهبازي"[i]

استاديميز اول "شهريـاردان" اوخو
             

                 ***

هانسي شاعير اونون اوسته دوغولدو؟

دشمنلرين بير-بير بورنو اووولدو

"صمد" دوشوب مزاريندا بوغولدو

آراز كيمين جوشقون مزاردان اوخو
      

          ***

دئ "هاتيفين"شيرين ديللي ديليندن

زنگبارين آشيب داشان سئليندن

"مسعود" بَيين قوناق سئون ائليندن

ياواش-ياواش سازلا "ائلدار"دان اوخو

                ***

گوللر آچيب بولبول چيخير جفادان

صفا آليرچايپاراميز "صـــفا"دان

وفاليدير "آذر ائـــللي" وفــادان

يوردوم كيمين شانلي دياردان اوخو

                ***

آراز كيمين "چنگيز"جوشوب چاغلايير

آغ آتينان "هوشنگ" بره باغلايير

لايلاي آنام دئييب "سلطان" آغلايير

يوخدو آنام اول گول عذاردان اوخو

                ***

"موغان اوغلو"گـزير موغان دوزونده

مين معنا وار "زاويــه لي" سؤزونـده

"اسلامي"بي سؤزون دئييرگؤزونده

"بارز" كيمين غملي غباردان اوخو

                ***

"رضايي"بَي طنزين يازيب گولدوروب

ائل-اوبانين دردي "كوير" اؤلدوروب

آغلارگؤزدن قــانلي مئيي دولدوروب

مئي مستيدير، ايچيب خوماردان اوخو

                ***

ائلچي گلير "ائلچي"بيزيم ائـللره

"گرگرلي"نين آدي دوشور ديللره

آشيق وورور ميضرابيني تــئللره

دویون گونو نازلي نگاردان اوخو

                ***

"قوجا" معلليمي ياددان چيخارتما

"يالقيز" قاليب گئت گؤر داها يوباتما

سن ده "وفــا" چوخ سؤزونو اوزاتما!

گئت بير قيراقدا دور، كناردان اوخو!

 

 

 

 

---

[i] 1ـ صفرعلي يوسفي اقدم 2ـ حاج اسرافيل صفرزاده 3ـ حاج مسعود ابراهيمي 4ـ مهدي همت­زاده 5ـ حاج اسماعيل ابراهيم­زاده 6ـ منوچهر فضلي خلف 7ـ چنگيز جعفري 8ـ هوشنگ جعفري 9ـ مجيد قليزاده 10ـ بختيار علي مرادي 11ـ رجب جعفري زاويه 12ـ مسعود اسلامي 13ـ عليرضا رضائي 14ـ سعيد جعفرزاده 15ـ بهبود مرادي 16ـحاج محمدعلي برزگر 17ـ يوسف علي گلدسته 18ـ مجيد صباغ ايراني

 

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

            

 

یاز گلیر

 

زاغ و زغن ترک ائلییب بــاغچانی

شنلیک ائدین گوللر آچیب یاز گلیر

مژده وئرین گـوللره گولشانیده

بـلـبل اوچـوب بـاغـچایا آواز گـلـیر

              ***

بلبل اوخور باغدا گؤزل قوشــلارا

لاله چیخیب داغداکی یوققوشلارا

خان ننه ­نین کؤنلو دوشوب خوشلارا

عاشیقلارین سینه­ سینه ساز گلیر

              ***

بولاق سـئوینجیدن دوشور قایناغا

شنگول گلـیر قـوردآوادا اویناغا

ائلات کؤچور یاواش-یاواش یایلاغا

گؤلجوکلره دسـته-دسـته قاز گلیر

              ***

تازه گلین باشـدان آچیر لئچه­ یی

ائشمه-ائشمه هؤرور یاشیل بیرچه­ یی

باش قووزاییر دؤشونده قار چیچه­ یی

طبیـعته بـیـر دولو اعجـاز گــلیر

 

قاطار-قاطار اوچور گؤزل دورنالار

ایل دوغـومـون آیدینلادیر آینالار

"دهکردی"[i] آهنگین چالیر زیرنالار

هر نه قدر ناز ائیله­ سن آز گـــلیر

              ***

گونش بوسه وورور قار دوداغیندان

شـلالـه­ لر آخـیر داغ یـاناغیندان

دلی جیران ایچیر مئی بولاغیندان

اویناقلاییب چمنلره نـــاز گــلیر

              ***

«گـوللر آچیب عطیر ساچیر ائللره

قیزلار صف باغلییب باخیر سئللره

خشکنـابیـن آدی دوشور دیللره»

شهریارین دالیندا شهباز گـــلیر

              ***

گؤزل یوردوم جنًت کیمین پارلاییر

نئی له چوبان قویونلاری هایلاییر

یولدان کئچن آتلیلاری چایلاییر

"وفا" اوچون چؤللره دمساز گـلیر

 

 

 

---

[i] رحمتلی علی اکبر مهدی­پور دهکردی ایل تحویلینده زیرنا چالاردی.